चुनाव अघि नै महाधिवेशन हुन्छ ः काँग्रेस महामन्त्री थापा

सिन्धुली, फागुन २४, २०८१ शनिबार ।

नेपाली काँग्रेसका महामन्त्री गगन थापाले चुनाव अगाडि नै पार्टीको महाधिवेशन हुने बताउनुभएको छ । आज सिन्धुलीको बेलघारीमा भएको नेपाली काँग्रेसको क्षेत्र नं. १ को क्षेत्रिय सम्मेलन कार्यक्रमलाई संवोधन गर्दै महामन्त्री थापाले समयमै महाधिवेशन हुने भएकाले पार्टीका वडा स्तरमा सदस्यता नविकरणको काम समयमा नै सक्न निर्देशन दिनुभयो । महामन्त्री थापाले कही कतै पार्टीको महाधिवेशन २०८४ को चुनाव पछि गर्ने हल्ला भए पनि विधान अनुसार नै महाधिवेशन हुने बताउनुभयो ।

थापाले चैत मसान्त भित्र वडा स्तरको क्रियाशिल सदस्यता नविकरण नगरे बैशाखमा नविकरण नहुने पनि स्पष्ट पार्नुभयो । महामन्त्री थापाले विद्युत प्राधिकरणका प्रमुख कुलमान घिसिङलाई स्पष्टीकरण सोध्ने लगायतका काम सरकारले गर्नु उचित नभएको पनि बताउनुभयो । प्रद्यानमन्त्री र मन्त्रीहरु अनाबश्यक काममा अलमल गर्नु भन्दा जनताको काममा केन्द्रित हुनु पर्ने उहाँको भनाई थियो ।

सम्मेलनलाई सह महामन्त्री जीवन परियार, काँग्रेस संसदिय दलका प्रमुख सचेतक श्यामकुमार घिमिरे, केन्द्रिय सदस्य मुक्ताकुमारी यादव, नेताहरु मोहन बराल, उज्ज्वल बराल, उपेन्द्र पोखरेल, रामकुमार पहाडी, गंगा दहाल लगायतले मन्तव्य राख्नुभएको थियो । कार्यक्रममा कर्ण थापा मगर नेतृत्वको क्षेत्रिय समितिले आमसभा मार्फत क्षेत्रिय सम्मेलन गर्न सफल भएकोमा प्रशंसा गरिएको थियो ।