सिन्धुलीको हरिहरपुरगढी गाउँपालिका ७ मा भुताहा

सिन्धुलीको हरिहरपुरगढी गाउँपालिका ७ मा भुताहा–बरुण सडकको सिलान्यास

सिन्धुली, पुष ५, २०८१ शुक्रबार ।

सिन्धुलीको हरिहरपुरगढी गाउँपालिका ७ मा भुताहा–बरुण सडकको सिलान्यास गरिएको छ । प्रदेश सरकार र हरिहरपुरगढी गाउँपालिकाद्धारा निर्माण हुन लागेको सडकको सिन्धुली क्षेत्र नं. २ का प्रतिनिधी सभा सदस्य लेखनाथ दाहाल राजनले सिलान्यास गर्नुभएको हो ।

सडक सिलान्यास कार्यक्रमको अवसरमा प्रतिनिधी सभा सदस्य लेखनाथ दाहाल राजनले हरिहरपुरगढी गाउँपालिकाको विकास लाई प्राथमिकीकरण गरेको बताउनुभएको छ । प्राथमिकिकरण गरेका योजनाहरुलाई स्थानीय, प्रदेश र संघिय सरकारको समन्वयमा पुरा गर्दै जाने उहाँले बताउनुभयो ।

गुर्जी बसपार्क बाट हरिहरपुरगढी–जितपुरगढी हुदै चिसापानी बाट चतरा सम्मको रिङरोड निर्माणको लागि पहल प्रयत्न गरिएको, सुके बरुण, क्यानभुता केमनचुली, हरिवन सडक निर्माणको लागि शिर्षक स्थापीत गरिएको, बरुण र क्यान भुताहाको लागि पक्की पुलको डिपिआर गरि निर्माण कार्य अगाडी बढाउने निर्णय समेत गरेको उहाँले बताउनुभयो ।

अहिलेको सरकारले कुनैपनि बहुबर्षिय ठेक्का सम्झौता नगरेकाले काम गर्न समस्या भइरहेको उहाँको भनाई छ । साथै हरिहरपुरगढी गाउँपालिकामा अन्य बिकास निर्माणको काम गर्न आफू प्रतिबद्ध रहेको उहाँले बताउनुभयो ।

कार्यक्रममा हरिहरपुरगढी गाउँपालिकाका अध्यक्ष बज्र ध्वज वाइवाले आज सिलान्यास भएको सडकको अफ्ठेरो ठाउँहरुको पहिले निर्माण सम्पन्न गर्ने र यसलाई निरन्तरता दिइने बताउनुभयो । साथै पक्की पुन निर्माण पश्चात सर्लाहिको हरिवन संग जोड्ने लक्ष्य रहेको उहाँले बताउनुभयो । गाउँपालिकाले प्रदेश तथा संघिय सरकार संग समन्वय गरेर गाउँपालिकाकै बिकट मानीने वडा नं. ७ लाई बिकास निर्माणको माध्यम बाट सुगम बनाउन आफु लागिपरिरहेको उहाँको भनाई छ ।

भुताहा–बरुण सडक निर्माणको लागि गडुर कन्ट्रक्सन एण्ड सप्लायर्स प्रा.लि. गोलन्जोर ३ सिन्धुलीले ६० लाख ९३ हजार ७ सय ८५ रुपैयामा निर्माणको जिम्मा लिएको हो ।