मिलिजुली सहकारीको १८ औँ वार्षिक साधारण सभा उद्घाटन

सिन्धुली–कमलामाई नगरपालिका–६,धुराबजारमा रहेको मिलिजुली बचत तथा ऋण सहकारी संस्थाको १८ औँ वार्षिक साधारण सभा आज (आइतबार)उद्घाटन गरिएको छ ।

कोरोना महामारीका कारण सहकारी विभागले जारी गरेको निर्देशिकाबमोजिम सप्ताहव्यापी रुपमा समापन हुने साधारण सभाको कमलामाई नगरप्रमुख खड्गबहादुर खत्रिले उद्घाटन गर्नुभयो । वार्षिक साधारण सभाको उद्घाटन गर्नुहुदै नगरप्रमुख खत्रिले मिलिजुली बचत तथा ऋण सहकारी संस्थाको मुक्तकण्ठ प्रशंसा गर्नुभयो । उहाँले भन्नुभयो,‘ मिलिजुली सहकारी जिल्लाकै उत्कृष्ठ सहकारी हो । ’

यस्तै सहकारीले समाजमा उल्लेख्य योगदान गरेको र अझै ठूलो परिणामको नतिजा दिनका लागि एक रुपतामा नीति र विधीलाई मानेर सिस्टम्मा जानुपर्ने आवश्यकता रहेको उहाँले बताउनुभयोे । यसैका लागी नगरभित्रका सहकारीहरुको प्रगती विवरण,अडिट रिपोर्ट संकलन कार्य सुरु गरिएको उहाँले जानकारी दिनुभयो । आर्थिक समृद्धिका लागीे सहकारीलाई उद्योग तथा उत्पादनसंग जोड्नु पर्ने नगरप्रमुख खत्रिको भनाई छ ।

धुराबजारस्थित कमलामाई पार्टी प्यालेसमा एक औपचारीक कार्यक्रमका विच उद्घाटन गरिएको वार्षिक साधारण सभा मंसिर १३ गते सम्पन्न गरिने छ । योविचको अवधिमा कोभिड–१९ को जोखीमलाई दृष्टिगत गर्दै सहकारीका सदस्यहरुसंग समुहगत रुपमा भेटघाट,अन्र्तक्रिया गरि सुझाव संकलन गरिने जनाइएको छ ।

कार्यक्रममा संस्थाकी अध्यक्ष बाल कुमारी श्रेष्ठले हाल संस्थामा बाल बचत र सदस्य समेत गरेर ४८२० जना सदस्य सेवाग्राहीलाई समेटी एक करोड ८० लाख ४७ हजार छ सय रुपैयाँ शेयर पुँजी संकलन गरि २० करोड कुल कारोवार गर्न सफल भएको बताउनुभयो ।

उहाँका अनुसार संस्थाले १२ जना कर्मचारीलाहरुलाई पुर्ण रोजगारी प्रदान गर्न सफल भएको छ । सहकारीले २२ वटा नीति निर्माण गरिसकेको पनि उहाँले जानकारी दिनुभयो । समुदायमा आधारीत सामाजिक र आर्थिक विकास गर्ने लक्ष्य र गरिवी निवारण वित्तिय समावेशिता र सशक्तिकरण जस्ता पवित्र उद्देश्य लिएर निरन्तर समृद्ध समाज निर्माणमा सहकारीलाई केन्द्रित गराइएको उहाँको भनाई छ ।

यस्तै संस्थाका सचिव उज्ववल ढकालले सहकारीको वार्षिक प्रगती प्रतिवेदन प्रस्तुत गर्नुभएको थियो । उहाँले प्रस्तुत गर्नुभएको प्रगती प्रतिवेदन अनुसार आर्थिक बर्ष २०७६÷०७७ मा संस्थाको संचालन मुनाफा ५६ लाख ४९ हजार ७२५ रुपैयाँ ५२ पैसा रहेको छ ।

यसैविच साधारण सभाको उद्घाटन सत्रमा सिड्स नेपाल,सिन्धुलीका अध्यक्ष दीपककुमार घिमिरेले करिब एक लाख २५ हजार रुपैयाँ र ४८ जना सदस्यहरुबाट प्रारम्भ गरिएको सहकारी हाल करिब ४ हजार सदस्यहरु र करिव २० करोडको कारोबार गर्न सफल भएकोमा सहकारी परिवारलाई बधाई दिनुभएको थियो ।

कार्यक्रममा सहकारीमा आवद्ध दश जना जेष्ठ नागरिक,उत्कृष्ठ बचतकर्ता,असल ऋणी,नियमित अधिकतम बाल खुत्रुके बचत कर्ता,उत्कृष्ठ बचत समुह लगायतलाई सम्मान समेत गरिएको थियो ।

स्वास्थ्य सुरक्षाको मापदण्ड पुर्ण रुपमा पालना गदैँ उक्त कार्यक्रम संचालन भएको हो । कार्यक्रम स्थलमा अनिर्वाय मास्कको प्रयोग,स्यानेटाइजर प्रयोग गर्नुका साथै कार्यक्रमका सहभागिहरुलाई भौतीक दुरी कायम हुने गरि राखिएको थियो ।