पञ्चकन्या पोखरीमा जनश्रमदान बाट बिभिन्न कामहरु हुदै

सिन्धुली, चैत २६, २०८१ मंगलबार ।

सिन्धुलीको मरिण गाउँपालिका ५ स्थित पञ्चकन्या पोखरीमा जनश्रमदान बाट बिभिन्न कामहरु भइरहेका छन् । ऐतिहासिक र धार्मिक महत्व बोकेको पञ्चकन्या पोखरी क्षेत्रको संरक्षण र प्रवद्र्धनका लागि श्रमदान अभियान बाट बिभिन्न कामहरु भइरहेको हो ।

हरित वातावरण संरक्षणमा टेवा पुर्याउने, गाउँपालिकालाई पर्यटनको उत्कृष्ट गन्तव्य बनाउने र प्राकृतिक सम्पदाको संरक्षणमा सबैको हातेमालो गर्ने उदेश्यले श्रमदान अभियान संचालन गरिएको हो । मरिण गाउँपालिका अध्यक्ष बिमर्श मुक्तान प्रख्यातको आब्हानमा नेपाल प्रहरी शसस्त्र प्रहरी स्थानीय लगायतको सहभागितामा श्रमदान कार्य चलिरहेको छ ।

श्रमदान बाट पञ्चकन्या पोखरी वरपर सरसफाई संगै बाल उद्यान निर्माण, हरियाली विस्तार, बिद्युत क्षमता विस्तार र संरचनागत सुधारका काम भइरहेको मरिण गाउँपालिका अध्यक्ष विमर्श मुक्तान प्रख्यातले जानकारी दिनुभयो । नागरिकले विकासका काम गर्नको लागि जनप्रतिधि चुनेको बताउदै आफु पनि संगै खटेर श्रमदान गर्दै आएको अध्यक्ष मुक्तानले बताउनुभयो ।

पञ्चकन्या पोखरीमा एक हप्तादेखि चल्दै आएको श्रमदान कार्यक्रममा पालिका अध्यक्ष, प्रमुख प्रशासकीय अधिकृत लगायत स्थानीय बासिन्दा, युवाहरू, सामाजिक अभियन्ता तथा सुरक्षाकर्मीहरूको सहभागिता रहेको छ । पञ्चकन्या पोखरीको संरक्षण र प्रवद्र्धनका लागि मरिण गाउँपलिकाले यस अघि देखिनै बिभिन्न पूर्वाधार निर्माण गरिरहेको छ ।

हिउँद महिनामा पञ्चकन्या पोखरीमा पिकनिक खान आउने र अन्य समयमा समेत दैनिक जसो आन्तरिक पर्यटकहरु पुग्ने गरेका छन् ।