हरिहरपुरगढी गाउँपालिकाको मझिनी दमार

हरिहरपुरगढी गाउँपालिकाको मझिनी दमार –बखफर सडकको शिलान्यास

सिन्धुली, बैशाख २, २०८२ मंगलबार ।

हरिहरपुरगढी गाउँपालिकाको मझिनी दमार –बखफर सडकको शिलान्यास गरिएको छ । हरिहरपुरगढी गाउँपालिकाका अध्यक्ष वज्रध्वज वाइबाको अध्यक्षता तथा प्रतिनिधिसभा सदस्य लेखनाथ दाहाल राजनको प्रमुख आतिथ्यतामा सडकको शिलान्यास गरिएको हो ।

वडा नम्बर ४ स्थित चाईचुटीमा लामा गुरुबाट पूजापाठ गरी सडकको शिलान्यास गरिएको हो । संघिय सरकारबाट बिनियोजित १ करोड बजेट बाट सडक निर्माणको गर्न लागिएको गाउँपालिकाले जनाएको छ । सिलान्यास कार्यक्रमको अवसरमा प्रतिनिधिसभा सदस्य लेखनाथ दाहाल राजनले सरकार परिवर्तनका कारण सिन्धुलीका विभिन्न सडकलाई बहुवर्षिय योजनामा लैजान नसकेको बताउनुभएको छ ।

उहाँले गुणस्तरीय काम र समयमा काम भए नभएको बारे सबैले निगरानी गर्नुपर्नेमा पनि जोड दिनुभयो । हरिहरपुरको खानेपानी र सिँचाइको समस्यालाई सम्बोधन गर्ने योजना बनाउन आग्रह गर्नुहुँदै सांसद दाहालले बजेट व्यवस्थापन गरिदिने प्रतिबद्धता जनाउनुभयो ।

कार्यक्रममा हरिहरपुरगढी गाउँपालिकाका अध्यक्ष वज्रध्वज वाइबाले अथक प्रयास पश्चात गाउँपालिकाकै भौगोलिक जटिलताले पिछडिएको ठाउँमा ड्रेन सहितको सडक ढलानको लागि बजेट विनियोजन गराउन सफल भएको भन्दै खुसी ब्यक्त गर्नुभयो । उहाँले चाइचुटिमा सिँचाईको लागि योजना निर्माण भइरहेको बताउनुहुँदै चाँडैनै यहाँका किसानलाई सिँचाईको लागि पानी उपलब्ध गराइने बताउनुभयो ।

स्थानिय पुवार्धार विकास आयोजना कार्यालय हेटौडाको आयोजना तथा हरिहरपुरगढी गाउँपालिकाको समन्वयमा शिलान्यास कार्यक्रमको आयोजना भएको थियो । कार्यक्रममा प्रमुख प्रशासकीय अधिकृत दिपेन्द्र कुमार पैकरा, गाउँपालिकाका प्रवक्ता तथा ४ नम्बर वडाका अध्यक्ष कमल राई, ५ नम्बर वडाका अध्यक्ष साईला लामा, ३ नम्बर वडाका अध्यक्ष कुल बहादुर भोलन, ७ नम्बर वडाका अध्यक्ष बिच बहादुर मोक्तान, ८ नम्बर वडाका अध्यक्ष धन बहादुर मोक्तान लगायतको उपस्थिती रहेको थियो ।