कमलामाई नगरपालिकामा एचपिभी खोप अभियान सम्बन्धी अभिमुखिकरण सम्पन्न

सिन्धुली, माघ १४, २०८१ सोमबार ।

बालिकालाई दिइने एचपिभी खोप अभियान संचालनको लागि कमलामाई नगरपालिकामा अभिमुखीकरण कार्यक्रम संचालन गरिएको छ । पाठेघरको क्यान्सर विरुद्धको एचपिभी खोप अभियान संचालनको लागि स्थानीय तह स्तरिय खोप समन्वय समिति, जनप्रतिनिधि एवं सरोकारवालाहरुको लागि अभिमुखीकरण तथा बहस पैरवी कार्यक्रम संचालन गरिएको हो ।

कार्यक्रममा कमलामाइ नगरपालिकाका नगर प्रमुख उपेन्द्र कुमार पोखरेलको प्रमुख आतिथ्यता तथा उपप्रमुख मन्जु देबकोटाको बिशेष उपस्थिती रहेको थियो । नेपाल सरकारले यहि माघ २२ गते देखि फागुन ६ गते सम्म कक्षा ६ देखि १० सम्मका छात्रालाई र विद्यालय नजाने १० देखि १४ वर्ष उमेर समूहका किशोरी लक्षित गर्दै एचपिभी विरुद्धको खोप अभियान सञ्चालन गर्न लागेको कमलामाई नगरपालिका स्वास्थ्य शाखाले जानकारी दिएको छ ।

कार्यक्रमको अवसरमा कमलामाई नगरपालिकाका नगर प्रमुख उपेन्द्र कुमार पोख्रेलले पाठेघरको मुखको क्यान्सर विरुद्धको एचपिभी खोप अभियान एक महत्वपुर्ण स्वास्थ्य पहल भएकाले यसले हजारौ महिलाहरुको जीवन बचाउन सकिने बताउनुभएको छ । यस अभियानको सफलताको लागि कमलामाई नगरपालिका सक्रिय रुपमा लाग्ने उहाँको भनाई छ ।

त्यस्तै कमलामाइ नगरपालिकाका मेडिकल अधिकृत डा. सुजन बिक्रम ढकालले अहिले एचपिभी खोप १४४ देशको राष्ट्रिय खोप तालिकामा समावेश गरेर किशोरीलाई दिँदै आएको जानकारी दिनुभयो । यसको प्रभावकारिता शतप्रतिशत सम्म रहेको विभिन्न अध्ययनले देखाइसकेकाले ढुक्क सँग खोप लगाउन उहाँको सुझाव छ ।