विश्वभर छरिएका नेपाली सेफहरुको आयोजनामा पहिलो पटक नेपाली फुड फेस्टिवल हुदैँ

विश्वभर छरिएका नेपाली सेफहरुको आयोजनामा आगामी बैशाखमा पहिलो पटक नेपाली फुड फेस्टिवल हुदैँछ । फेस्टिवलमा विश्वभर कार्यरत सेतो कोट लगाउने सेफहरु (नेपाली भान्से) एकैठाँउ भेला हुदैछन् । नेपाली सेफ सोसाइटी र अन्तराष्ट्रिय नेपाली सेफ सोसाइटीको संयुक्त आयोजनाका फुड फेस्टिवल हुन लागेको हो ।

आगामी वैशाख ६ गते भृकुटीमण्डप स्थित प्रर्दशनी मार्गमा हुन लागेको कार्यक्रमको तयारीमा यतिबेला विश्वभरका नेपाली भान्सेहरु जुटेका छन् । कार्यक्रममा मध्यपुर्व, युरोपका विभिन्न मुलुक, अमेरिका लगायत ३६ देशमा कार्यरत ५ हजार सेफ प्रतिनिधीरुले सहभागीता जनाउदै छन् । जसमा नेपाल पर्यटन वार्ड, पर्यटन मन्त्रालय र परराष्ट्र मन्त्रालयको सहयोग रहने अन्तराष्ट्रिय सेफ सोसाइटीका केन्द्रिय संयोजक अरुण अधिकारीले जानकारी दिनुभयो ।

फेस्टिवलले सेफहरूलाई एकताबद्ध गर्ने र नेपाली खाना संस्कृतिलाई विश्वभर प्रवद्र्धनमा मद्दत गर्नेछ । साथै नेपाली सेफहरूबीच सञ्जाल निर्माण अन्तराष्ट्रिय स्तरमा कार्यरत नेपाली सेफहरूलाई एकत्रित गरेर अनुभव आदान–प्रदान गर्ने, नेपाली परिकारहरूलाई विश्व बजारमा चिनाउने तथा सेफहरूका पेशागत चुनौती र अवसरहरूबारे छलफल गर्न मञ्च उपलब्ध गराउने उद्देश्यले फेस्टिवल हुन लागेको संयोजक अधिकारीले बताउनुभयो । फेस्टिवलमा देश तथा विदेशका गरी ४० वटा खानाका स्टल राखिनेछ । जसमा नेपाली सेफहरुले अन्तराष्ट्रिय बजारमा तयार पार्ने खानाको स्वाद लिन पाइने अधिकारीले बताउनुभयो ।

यस्तै नेपाली खानाको माध्यमबाट नेपालका सांस्कृतिक पक्षलाई विश्वसामु पु¥याउन मद्दत पुग्ने उहाँको भनाई छ । फेस्टिवलमा नेपाली परम्परागत परिकार देखि आधुनिक परिकारहरूको प्रदर्शनी, सेफहरूका लागि नयाँ कौशल र प्रविधिको ज्ञान, सेफ अवार्डः उत्कृष्ट सेफहरूलाई सम्मान, सोसाइटीको किताव विमोचन, राष्ट्रिय कलाकारहरुको उपस्थितिमा नेपाली गीत–संगीत र लोपउन्मुख झाकीँ सहितका नृत्य कला प्रस्तुत गरिनेछ ।

प्रथम महाधिवेशनको तयारी

यस्तै अन्तराष्ट्रिय नेपाली सेफ सोसाइटीको प्रथम महाधिवेशनको तयारी थालिएको छ । काठमाण्डौँमा हुने महाधिवेशनले विश्वभरका सेफहरुको उपस्थितिमा आगामी कार्यकालका लागि नयाँ नेतृत्व चयन गर्नेछ । महाधिवेशन अघि अहिले विभिन्न मुलुकमा अधिवेशन चलिरहेको छ ।

हाल ११ देशमा अधिवेशन सम्पन्न भएको र बाँकी देशमा पनि भइरहेको अन्तराष्ट्रिय नेपाली सेफ सोसाइटीका प्रवक्ता युवराज तामाङले जानकारी दिनुभयो । नेपाली सेफ सोसाइटीले नेपाल भित्र र नेपाल बारिहका देशमा रहेका नेपाली भान्सेहरुलाई एकतावद्ध गदै आएको छ ।

२०१८ मा युएई बाट सुरु भएको सेफ सोसाइटी अहिले ३६ देशमा संगठीत भएको छ । सेफ सोसाइटी नेपाल सरकार परराष्ट्र मन्त्रालयमा दर्ता समेत भएको छ ।