सिन्धुलीमा विमानस्थल निर्माण हुने

सिन्धुली–सिन्धुलीमा आन्तरिक विमानस्थल निर्माण हुने भएको छ । कमलामाई नगरपालिका ८–सिस्नेरीमा विमानस्थल निर्माण गर्ने कार्य अगाडि बढेको हो । विमानस्थल निर्माणस्थल सिन्धुलीमाढीबाट १२ किलोमिटर तथा भिमान बजारबाट ६ किलोमिटर दूरीको बीचमा वीपी राजमार्गसँग जोडिएको छ । विमानस्थल निर्माणमा लागि नियामक निकाय नेपाल नागरिक उड्डयन प्राधिकरणले बजेटसमेत छुट्याएको छ ।

नेपाल नागरिक उडड्यन प्राधिकरणले चालू आर्थिक वर्ष २०७७÷०७८ को बजेटमा विमानस्थल निर्माणस्थलको वातावरणीय प्रभाव मूल्यांकन (इआइए)का लागि बजेट व्यवस्था गरेको जनाएको छ । प्राधिकरण महानिर्देशक राजन पोखरेलले विमानस्थल निर्माणका लागि चालू आर्थिक वर्ष भित्र वातावरणीय प्रभाव मूल्यांकन रिपोर्ट तयार गर्ने गरी बजेट छुट्टाईएको बताउनुभयो ।

‘विमानस्थल निर्माणका लागि प्राधिकरणले विस्तृत अध्ययन समेत गरिसकेको छ । अध्ययनमा कमलामाई नगरपालिका ८–सिस्नेरीमा विमानस्थल निर्माण गर्न सम्भव भएको उहाँले बताउनुभयो । उहाँका अनुसार विस्तृत अध्ययनका आधारमा चालू आर्थिक वर्षभित्रै इआइए रिपोर्ट तयार गर्न २६ लाख रुपैयाँ बजेट विनियोजन भएको हो ।