अखिल नेपाल महिला संघ जिल्ला कमिटि सिन्धुलीले गृह मन्त्रालयलाई ज्ञापन पत्र

सिन्धुली, मंसिर १०, २०८१ सोमबार ।

लैङ्गिक हिंसा विरुद्धको १६ दिने अभियानको अवसरमा अखिल नेपाल महिला संघ जिल्ला कमिटी सिन्धुलीले ज्ञापन पत्र बुझाएको छ । आज देखि सुरु भएको लैङ्गिक हिंसा विरुद्धको १६ दिने अभियानको अवसरमा अखिल नेपाल महिला संघ सिन्धुलीले जिल्ला प्रशासन कार्यालय सिन्धुली मार्फत गृह मन्त्रीलाई ज्ञापन पत्र बुझाएको हो ।

अखिल नेपाल महिला संघले स्थापना कालदेखि नै नेपाली महिलाको अधिकार तथा लोकतन्त्र प्राप्तीको लागि अभियान संचालन गर्दै आइरहेको अखिल नेपाल महिला संघ सिन्धुलीले जनाएको छ । महिला विरुद्ध हुने घरेलु हिंसा, बोक्सीको आरोप तथा दाइजोका कारण हुने घरेलु हिंसा, बेचबिखन, ओसारपसार छाउपडिको नाममा यौनजन्य हिंसा जस्ता परिवार बिद्यालय तथा सार्वजनिक ठाउँमा हुने हिंसा र सामाजिक संजाल बाट हुने हिंसा बाट महिलाहरु पिडित भइरहेको र हिंसाका कारण महिलाहरुले बाच्न पाउने अधिकार बाट समेत बञ्चीत भएको ज्ञापन पत्रमा उल्लेख गरिएको छ ।

गएको आर्थिक बर्षमा नेपाल प्रहरीमा दर्ता भएको घटनाको तथ्यांक हेर्दा महिला विरुद्धको हिंसा भयावह देखिएको छ । महिला विरुद्ध भएको हिंसाले महिलालाई मात्रै नभई परिवार, समाज र सिंगो मुलुकलाई नै नकारात्मक असर पारेको छ । समृद्ध नेपाल सुखी नेपालीको लक्ष्यमा पुग्नको लागि यस्ता हिंसाको न्युनिकरण र निराकरण गर्न आवश्यक छ । अधिकांस मुद्धामा सामाजिक राजनैतिक दबाव, अनुसन्धान कार्यमा उदासिनता, ढिलासुस्ती, पिडकले सजाय पाउने अवस्था नदेखिनुले कानून कार्यन्वयनमा अझै समस्या देखिएको ज्ञापन पत्रमा भनिएको छ ।

संविधान र कानूनी शासनको ब्यवस्थाको कार्यान्वयन गर्दै हिंसारहित वातावरणको सृजन गर्न राज्यले कडा कदम चाल्न आवश्यक छ । त्यसमा पनि मुलुकमा शान्ति सुरक्षा कायम गर्ने मुख्य जिम्मेवार निकायको रुपमा गृह प्रशासन भएकाले हाल महिला विरुद्ध भइरहेको हिंसा निराकरण गर्न, हिंसा भएको अवस्थामा दोषीलाई कडा कार्वाहि गर्न, द्रुत र मर्यादित न्याय प्रणालीको स्थापना गर्न र पिडितलाई न्याय र उचित क्षतिपूर्तिको ब्यवस्था गर्न ज्ञापन पत्र मार्फत जोडदार माग गरिएको छ ।

अखिल नेपाल महिला संघ सिन्धुलीकी अध्यक्ष पार्वती भट्टराईले सहायक प्रमुख जिल्ला अधिकारी कृष्णमणी फूयाँल मार्फत गृह मन्त्रीलाई ज्ञापन पत्र बुझाउनुभएको हो ।